അഭയാർത്ഥികളുടെ ആരോഗ്യ ആനുകൂല്യങ്ങൾ വെട്ടിക്കുറയ്ക്കണം: കാനഡയിൽ രാഷ്ട്രീയ പോര് മുറുകുന്നു

അഭയാർത്ഥി അപേക്ഷ നിരസിക്കപ്പെട്ടവർക്ക് നൽകിവരുന്ന ആരോഗ്യ പരിരക്ഷാ ആനുകൂല്യങ്ങൾ പുനഃപരിശോധിക്കണമെന്നും നിയന്ത്രിക്കണമെന്നും ആവശ്യപ്പെട്ട് കാനഡയിലെ കൺസർവേറ്റീവ് പാർട്ടി ലിബറൽ സർക്കാരിന് മേൽ സമ്മർദ്ദം ശക്തമാക്കി. കൺസർവേറ്റീവ് എംപി മിഷേൽ റെമ്പൽ ഗാർനർ പാർലമെന്റിൽ അവതരിപ്പിച്ച പ്രമേയത്തിൽ, ഗുരുതരമായ കുറ്റകൃത്യങ്ങളിൽ ഏർപ്പെടുന്ന വിദേശികളെ ഉടനടി പുറത്താക്കണമെന്നും ആവശ്യപ്പെടുന്നുണ്ട്.

നിലവിൽ 'ഇൻ്ററിം ഫെഡറൽ ഹെൽത്ത് പ്രോഗ്രാം' (IFHP) വഴി അഭയാർത്ഥികൾക്ക് ലഭിക്കുന്ന വിപുലമായ ചികിത്സാ സൗകര്യങ്ങൾ, സാധാരണ കനേഡിയൻ പൗരന്മാർക്ക് ലഭിക്കുന്നതിനേക്കാൾ കൂടുതലാണെന്നും ഇത് അടിയന്തര ജീവൻരക്ഷാ ചികിത്സകളിലേക്ക് മാത്രമായി ചുരുക്കണമെന്നുമാണ് പ്രതിപക്ഷത്തിന്റെ വാദം. അഭയാർത്ഥി സഹായ പദ്ധതിയുടെ ചിലവ് കുത്തനെ ഉയരുന്നതിനെക്കുറിച്ചും റിപ്പോർട്ടിൽ ആശങ്ക പ്രകടിപ്പിക്കുന്നു. 2020-21 കാലയളവിൽ 211 മില്യൺ ഡോളറായിരുന്ന പദ്ധതിയുടെ ചിലവ് 2024-25-ൽ 896 മില്യൺ ഡോളറായി വർദ്ധിച്ചുവെന്ന് പാർലമെന്ററി ബജറ്റ് ഓഫീസർ (PBO) ചൂണ്ടിക്കാട്ടുന്നു. 2029-30 ഓടെ ഇത് പ്രതിവർഷം 1.5 ബില്യൺ ഡോളറിലെത്തുമെന്നാണ് പ്രവചനം.

കാനഡയിലെ പൊതുജനാരോഗ്യ സംവിധാനത്തിൽ സാധാരണക്കാർക്ക് ലഭിക്കാത്ത കൗൺസിലിംഗ്, ദന്തചികിത്സ, കാഴ്ച പരിശോധന തുടങ്ങിയ അധിക സൗകര്യങ്ങൾ അഭയാർത്ഥി അപേക്ഷ നിരസിക്കപ്പെട്ടവർക്ക് നൽകുന്നത് നിർത്തലാക്കണമെന്ന പ്രമേയത്തിന്മേൽ ചൊവ്വാഴ്ച പാർലമെന്റിൽ വോട്ടെടുപ്പ് നടക്കും